ನಾ ಕಂಡ ಗಾಂಧಾರಿ

ನಾ ಕಂಡ ಗಾಂಧಾರಿ

ಅಲ್ಲಲ್ಲಿ ಬೀದಿಗಳಲಿ 

ಸೆರಗೆಳೆದು ನಡೆಯುತ್ತಿದ್ದಾಳೆ;

ಸುಗಂಧದ ಸುಳಿವಿಲ್ಲದೆ

ರಣಬಿಸಿಲಲ್ಲಿ ಬೇಯುತ್ತಿದ್ದಾಳೆ

ಸುತ್ತಿಕೊಂಡಿದ್ದಾಳೆ  ಬಟ್ಟೆ

ಕಣ್ಣಿಗಷ್ಟೇ ಅಲ್ಲ ಬಾಯಿಗು !

ಕುರುಡನಲ್ಲದ ಕುಡುಕ ಗಂಡನ

ದರಬಾರಿನಲಿ ಇಂದು

ದ್ರೌಪದಿಗು  ಹೀನವಾಗಿ

ಬತ್ತಲಾಗಿದ್ದಾಳೆ .

ಅಲ್ಲತ್ತ ಭೀಷ್ಮ ಕೃಪರ

ಮಾತಿಗೂ ಬೆಲೆಯಿಲ್ಲ;

ಇತ್ತ ಊರವರ ದುರ್ಯೋಧನ

ತನ್ನ ಮಗನೆನ್ನಲು

ಮಮತೆ ಕೇಳುವುದಿಲ್ಲ !!

ಬದುಕಿನಿತು ರಣರಂಗ-

ವಾಯ್ತೆಂದು ವ್ಯಥಿಸಿದರೂ

ಸಂಜೆಯೂಟಕೆ  ಮತ್ತವಳೇ ದುಡಿಬೇಕಲ್ಲ!!

                                           - ಕಾವ್ಯಮಯಿ