ಕೊಳದ ತಡಿಯ ಅಲೆಗಳು

ಕೈಯ ಬೆರಳಲ್ಲಿ ನೀ ನೀರ ಅಲೆಯ
ತವಕಿಸುತ ನಸುನಕ್ಕೆಯಾ? ನಿನ್ನ ಬಿಂಬವ
ಕದಡಿ ಅಲೆ ನೂರು ಸಾಗಿತ್ತಾ
ಸಾಗಿತ್ತಾ ಬಲು ದೂರ ತೀರ

ಕೊಳದ ತಡಿ ಹಸಿ ಹಸಿರು
ಹೂ ಬಳ್ಳಿ ಸಾಲು; ಯಾರೊಳಗು
ವ್ಯಥೆ ತುಂಬಿ ಬಾಡಿ ಹೋದಂತೆ
ಇರಲಾರನೆಂಬವು...

ತಿಳಿ ಮುಗಿಲ ನಡುವಲ್ಲಿ ಕರಿ ಮೋಡ
ಗುಡುಗುವ ಭಯಾಟ್ಟಹಾಸ
ಎದೆ ಸೀಳಿ ಹೊಕ್ಕ ಮಿಂಚು
ಸುರಿಸಿದ ರಕ್ತ ಹಾದಿ ತುಂಬ

ಅಳಿಸಿ ಹೋಗುವ ಸಾವಿರ
ಹೆಜ್ಜೆ ಗುರುತಿನ ಸೋನೆ
ಸುರಿ ಸುರಿದು ಹರಿಯಿತು
ಮನವ ದಾಟಿ ;ಎಲ್ಲೆ ಮೀರಿ
                 
                                 -ಕಾವ್ಯಮಯಿ