ತವರು ಮನೆ ಚಿಂತೆ

ವರುಷವೆರಡಾಯಿತು
ಹಬ್ಬಕ್ಕೆ ತವರಿಗೆ ಹೋಗಿಲ್ಲ
ಚೌತಿ, ಪಂಚಮಿ, ಷಷ್ಠಿ , ಅಷ್ಟಮಿ, ನವಮಿ
ಹಬ್ಬಗಳಲ್ಲ ದಿನಗಳಂತೆ ಜಾರಿಹೋಗಿಯಲ್ಲ ..
ಹಸುವು ಹಡೆದಿದೆಯಂತೆ; ನಾಯಿ ಕಳೆದಿದೆಯಂತೆ;
ತಂಗಿಯನು ನೋಡಲು ವರ ಬರುವನಂತೆ.
ಅಮ್ಮನಿಗೆ ಸೌಖ್ಯವು  , ಅಪ್ಪನಿಗೆ ಮೀನ್ಸಾರು
ಇಲ್ಲವೆನ್ನಲು ಸಾಮ್ಯತೆಯದೆ ಗೊಂದಲ
ಪದ್ಮಿನಿಯು ಬಸುರಂತೆ ; ಮಾವಮಿಡಿ ಚಿಗುರಂತೆ ;
ಬಳೆಗಾರ್ತಿ ಹೊಸಬಗೆಯ ಬಳೆ ತರುವಳಂತೆ
ಎರಡೇ ದಿನ ಹೋಗಿ ಬರಲೆನ್ನ ಹಂಬಲ
ವರುಷವೆರಡಾಯಿತು
ಹಬ್ಬಕ್ಕೂ ತವರಿಗೆ ಹೋಗಿಲ್ಲ


                                                 -ಕಾವ್ಯಮಯಿ 

ನಾ ಕಂಡ ಗಾಂಧಾರಿ

ನಾ ಕಂಡ ಗಾಂಧಾರಿ

ಅಲ್ಲಲ್ಲಿ ಬೀದಿಗಳಲಿ 

ಸೆರಗೆಳೆದು ನಡೆಯುತ್ತಿದ್ದಾಳೆ;

ಸುಗಂಧದ ಸುಳಿವಿಲ್ಲದೆ

ರಣಬಿಸಿಲಲ್ಲಿ ಬೇಯುತ್ತಿದ್ದಾಳೆ

ಸುತ್ತಿಕೊಂಡಿದ್ದಾಳೆ  ಬಟ್ಟೆ

ಕಣ್ಣಿಗಷ್ಟೇ ಅಲ್ಲ ಬಾಯಿಗು !

ಕುರುಡನಲ್ಲದ ಕುಡುಕ ಗಂಡನ

ದರಬಾರಿನಲಿ ಇಂದು

ದ್ರೌಪದಿಗು  ಹೀನವಾಗಿ

ಬತ್ತಲಾಗಿದ್ದಾಳೆ .

ಅಲ್ಲತ್ತ ಭೀಷ್ಮ ಕೃಪರ

ಮಾತಿಗೂ ಬೆಲೆಯಿಲ್ಲ;

ಇತ್ತ ಊರವರ ದುರ್ಯೋಧನ

ತನ್ನ ಮಗನೆನ್ನಲು

ಮಮತೆ ಕೇಳುವುದಿಲ್ಲ !!

ಬದುಕಿನಿತು ರಣರಂಗ-

ವಾಯ್ತೆಂದು ವ್ಯಥಿಸಿದರೂ

ಸಂಜೆಯೂಟಕೆ  ಮತ್ತವಳೇ ದುಡಿಬೇಕಲ್ಲ!!

                                           - ಕಾವ್ಯಮಯಿ