ನಿನ್ನ ನೆನಪು

 ನಿನ್ನ ನೆನಪು

 ನಿನ್ನ ಇರುವನ್ನು ನಾನುಕಂಡೆ
 ನಿನ್ನಿಂದ ದೂರವಿದ್ದು
 ಸುತ್ತಮುತ್ತ ಸುಳಿವ ನೆನಪ
 ನೆಪವಾಗಿ ಕಾಡುತ್ತಿದ್ದು

 ಇಹುದು ಬಯಕೆ ನೂರು
 ಬಳಿಬಂದು ತಬ್ಬಿಕೊಳ್ಳು
 ಪ್ರೇಮದಲೆಯಲಿಂದು ಮಿಂದು
 ಮನಸ ತುಂಬಿಕೊಳ್ಳು

 ತಾಳೆನಿನ್ನು  ವಿರಹ ವ್ಯಥೆಯ
 ಬದುಕ ಗತಿ ಅಗೋಚರ
 ಕಾಲವಿರುತ  ಗೆಳೆಯ ನೀನು
 ಬಂದು ಸೇರು ಹತ್ತಿರ
                   
                  -ಕಾವ್ಯಮಯಿ

ಕವನದ ಹುಟ್ಟು

ಮನದ ಮೂಲೆಯಲ್ಲಿ
ಕವಲೊಡೆದ ಕನಸಿಗೆ
ಅಕ್ಷರದ ರೂಪಕೊಟ್ಟು
ಹಾಳೆಯೊಳಗಿಳಿಸಿ
ನಗುವೊಂದು ಮೂಡಲು
ಹುಟ್ಟಿತೆನ್ನ ಕವನ

ಪ್ರಾಸ ಸಮಾಸಾದಿಗಳ
ಅಲಂಕಾರ ಶೃಂಗಾರ
ಬೇಕೊ? ಬೇಡವೋ !
ಎಂದೆಣಿಸುತಲೇ
ನವಜಾತ ಶಿಶುವಂತೆ
ಹುಟ್ಟಿತೆನ್ನ ಕವನ

ಬಹುದಿನದ ಬಯಕೆಗೆ
ಮಡುಗಟ್ಟಿದ ಕೈಗೆ
ಜೀವವನು ತುಂಬಿ
ಹಳೆಯ ನೆನಪುಗಳ
ಜೊತೆಯಲ್ಲಿ ಹೊಸೆಯುತ
ಹುಟ್ಟಿತೆನ್ನ ಕವನ
                 -ಕಾವ್ಯಮಯಿ

ಮೌನಕ್ಕೆ ಶರಣಾಗಿ.

ಅಕ್ಕರಗಳ ಆಸುಪಾಸು ಹೊಕ್ಕು ಒಂದಷ್ಟು
ಬಿತ್ತರಗಳ ತರಗೆಲೆಗಳು
ಗಿರಕಿ ಹೊಡೆದಂತೆ ;ಬಿರುಗಾಳಿ ಬರುತೆನಲು
ಮೌನಕ್ಕೆ ಶರಣಾಗಿ.
ಕವಿಯುತ್ತ ನಿಶ್ಶಬ್ಧ
ತಣ್ಣಗಾಗುವ ತೆವಲು
ಮತ್ತೆ ಸವಿಗಾಳಿಗೆ ಮೈಯೊಡ್ಡಿ
ಮೊಗವರಳಿ ಸವಿಯುತ್ತಾ ಸಾಗಿ
ಮೌನಕ್ಕೆ ಶರಣಾಗಿ.
ಆ ಗಾಳಿ ಗಂಧದೊಳು ಮಿಂದೆದ್ದು
ಲೇಖನಿಗೆ ಇಳಿಯಿಸುತ
ಮತ್ತೆ ಅಕ್ಕರಗಳ ನಡುವೆ
ಮೌನಕ್ಕೆ ಶರಣಾಗಿ. 
                         - ಕಾವ್ಯಮಯಿ